North Garo Hills, Dame Bibra, Resubelpara-oni Rajip Sangma-ni jikgipa bilsi 21 ong·gipa Rokkime R. Marak, an·tangni nokoni July 8 tarikoni gimaenga ine koborna parakataha. Ua Wensingh Ch. Marak aro Chonteng R. Marak-ni demechik ong·a, jean nanggipa lekka pancharang aro jio mobile phone-no 9864176168 number-ko ra·e pring 3:30 bajimangoni nokoni gimaaha. Rokkime Marak-ko uni segipa, ma·drangrang aro songni nokni manderang songni sepangjol biaprangoniko sandibeoba man·jaha ine u·iataha. Uni changroa 5.5 ft mang ong·gen, kni rong gisim, sakchigrik, ong·katangani somoio kurti tangsim rong aro long pant a·mang rongko gane re·ongkatangaha.
Rajip Sangma, jikgipako sandina jotton ka·beoba ru·utbea salrangonin nokona sokbakujaengani gimin Resubelpara police thanao mokordoma ka·angaha. Police dolrang iani bidingo Garo Hills-ni gipin thana-rangonaba janapataha aro Assam a·dokni police-rangnaba kobor on·ataha ine segipa Rajip Sangma-na u·iataha.
Segipa uni jikgipako sandibeoba nikjaengani gimin North Garo Hills-ni ACHIK Resubelpara-Mendi Regional Unit-na dakchakpachina mol·molataha ine Joint Secretary, Nana Sangma Ku·rongdik koborna parakataha.
