Tura songjinmao bilsianti chatchirangni gisepo ong·atronggipa chang 4 gipa Inter-Mahari Football Tournament 2024-ko da·al salo Chandmari, GBHSS kal·chakramo Rongmuthu aro Snal maharini kal·anichi a·bachengataha. Maharirangni gisepo robol kal·susaaniko Tura songjinmao District Football Association (DFA), Tura pangna bilsian ong·atrongbaenga.
Ia bilsini Inter-Mahari Football Tournament, skanggipa salo Education Minister Rakkam Sangma mongsonggipa ong·e sokbaaha. Una agreba West Garo Hills, Tura District Sports Officer, Saljagring Marak, WGH aro EGH a·jani DFO, Rupangkar Marak da·alni program-o bakko ra·angaha.
Da·al salo, Rongmuthu aro Snal maharirangni gisepo kal·anio Rongmuthu chegipa ong·aha jeon uamang 3-1 goal-chi snal mahariko altubee amataha. Apsandaken Snal maharirang jotton ka·beoba skanggipa kal·anio chena man·jaha aro ia bilsini kal·anio ama cha·anichi a·bachengna nangaha.
Da·alni kal·ani skanggipa sal ong·genchimoba bang·a manderang nina re·batokaha. Re·bagipa sakantian uamangni maharina kal·a gimiko ka·kimchae chakaniko nikangna man·aha. Re·anggipa bilsio chong·motan 2023 Inter Mahari Football tournament-o Agitok mahari chegipa ong·angaha. Ia bilsioba biltinggrik susaaniko nikangna ka·dongsoenga maina bilsirikkitan maharirangni gisepo susagrikani bilakroroenganiko an·ching nikangna man·enga.
