Bangladesh a∙songo so·sojengjeng ong∙engani gisepon Bangladesh-ni bang·a manderang Garo Hills-ni dingtang dingtang a∙jarangona napsrukbaenganiko kobor man∙soe CEC H.Q Tura-ni Garoland State Movement Committee (GSMC), Garo Hills-ni dambonga a∙jarangni Deputy Commissioner-rangna chittiko see u·iatangaha.
Uamangni chittio janapatanigitade sak 280 mangnigita Bangladesh-ni manderang sima arigita sriksrik Garo Hills-ona napbaaha ine aganangaha. Indake Bangladesh-oni Garo Hills-ni dingtang dingtang a∙jarangona napsruke dongenganiko champengsonagita sima arini pilak kona nosikrango checkpost-rangko songdime on∙china didiangaha.
Indake ong∙engon Garo Hills-ona Bangladesh-ni manderangni napsrukanichi mikkangchi so·sojengjeng ong∙aona soknaba gnang ine janapataha. Indakgipa a·sel obostarangona sokaoniko naljokatna man∙agita je manderang Bangladesh-oni Garo Hills-ni dingtang dingtang a∙jarango napsruke dongengachim uamangko ta·rake am∙sandianiko dakchina aro so·sojengjeng ong∙anirang tom∙tomangan baksa watatpilchina GSMC dolrang didiangaha.
