Batanggimin somoio Meghalaya Civil Services (MCS) Preliminary Examination-ko November 4, 2023 tariko seatgipa porikkani result-rangko December 15, 2023-o Meghalaya Public Service Commission (MPSC) parakatgenchimoba jasnini ja∙man jean re∙anggipa July jao nipiltaianiko dake adita candidate-rangko pass ka∙dapataha ine nikna man∙aha. Ian mongsonggipa mains porikka ong∙na jagnina skang mangmang uamangko pass ka∙ataniara chu∙gimik porikakko chalaianiko aro ong∙atanio kakketgijaniko mesokan baksana dal∙dalgipa officerrangni mandeskako ra∙dona aro niamni a∙palo kam ka∙aniko parakani ong·a ine saksa Social Activist Cherian Momin matnangataha.
Kakket ong∙e kamrangko ka∙nagita skanggipao, porikka pass ka∙giparangni Preliminary Examination-o badita mancha mark ma∙naniko parakatna MPSC-ko didiataha. Iako dakanichi porikkako mai cholon bewalchi niangaha aro badia gadango dakgualanirangko ka∙aha uko ma∙sina mang∙en ine aganangaha. Una agreba porikkao minggittam sing∙anirango dakgualaniko nikna man∙aha jekon mai dakgipa nipilataianio pangchake ia ong∙gijagipa sing∙anirangna mark-rangko chamatanikoba MPSC chu∙gimik talataniko on∙a nangenga ineba Momin janapangaha. Ia pilakon Supreme Court-ni on∙gimin raio pangchake porikka segiparang an∙tangtangna ma∙sie ra∙na bil donga jedakode uamang kakket bewalo kam ka∙anirangko u∙ina man∙gen ine Momin aganaha.
Da∙o ong∙enggipa obostarangko name dake nipiltaie kakketgipa bewalo kamrangko ka∙achisa mikkang nitee kamrangna rim∙napaniko galna man∙gen aro mikkangchi kamna galgipa candidate-rang MPSC-o ka∙dongna man∙gen. Ia gimikko nigrike mikkangchi maming donuanigri kakket ong∙e porikkarangko ong∙ate candidate-rangni man∙gimin mark-rangkoba jinmana parakatna nanga aro jemangan niamni a∙palo kam ka∙gipa manderangko kragipa sastiko on∙a nanga ine Momin aganangaha. Unbaksana indakgipa obostarangko nirokna dingtangmancha jakgitel ong∙e ka∙na man∙gipa panel-ko seokna nangchongmota aro MPSC-ni ning∙o kakket ong∙e kamrangko ka∙gipa donggenchimode mikkangchi porikkarangko ong∙atanio maming neng∙nikagri ong∙atna man∙anggen ineba Momin janapangaha.
