Da∙al salni bako, Kharkutta ni MLA Rupert Momin, North Garo Hills a∙jao gital rikenggipa Kharkutta Government Higher Secondary School-ona re∙ange nirokanganiko dakeaha. Kharkuttani wilwilao dongenggipa bi∙sarangna namgipa skia-poraniko on∙a aro bida pakwataniko namdapatna krenge jotton ka∙anggen ine Rupert Momin aganangaha. Ian uamang dolni ku∙rachakgimin kamba ong∙achim ine ua agandapangaha.
Chadamberangna nambatgipa cholrangko on∙e uamangko chu∙sokgipa ong∙ate songsalko re∙dilna aro mandeskana on∙pilskana dakchakaniko on∙a kusi ong∙a ine Momin aganangaha. Momin uni agananio sakanti ma∙apa aro chadamberangkoba skia-poraianio gisik nanggiparang ong∙china didianikoba on∙angaha.
