Da·al salni bako kam ka·chakram biaprango me·chikrangni kosako kragija dakani bidingo (Prevention, Prohibition & Redressal) Act, 2013 niamo pangchake skie on·ani program-ko West Garo Hills a·jao songdongenggipa manderangna Tura Circuit House-o Meghalaya Administrative Training Institute (MATI), Shillong-nigita ong·atangaha. Ia programko ong·atani mingsonganiara kam ka·chakram biaprango me·chikrang maming jajrenganigri kamtangko ka·na aro uamangni kosako kragija dakaniko champengna ja·ku de·ani ong·a.
Ia program-o Advocate aro Meghalaya State Commission for Woman (MSCW)-ni gitcham member Rebina Subba, kam ka·chakram biapo me·chikrangni kosako dingtang dingtang kragija dakani rokomrangni bidingo talate on·angan baksana SHW Act, 2013-ni niamo pangchake badi ka·na man·ani bidingo agantalate on·angaha. Unbaksa je kam ka·chakram biapon sak 10-na bate kam ka·giparangko rakkigenchimode kragija kamrangko ka·enggiparangni kosako badi ka·nagita niamo pangchake Internal Complaint Committee-ko songchinagitaba Subba ge·etangaha.
Indake kam ka·chakram biapo me·chikrangni kosako kragija dakaniko champengna pilak IC Member-rangko uamangni ka·rimskarang baksa tom·e iani bidingo talate on·aniko dakjringchina ge·etangan baksa Internal Committee-o bak ra·gijarangko dai ra·naba Subba aganangaha. Ian kam ka·chakram biapo me·chikrangni kosako kragija dakaniko champengna aro me·a me·chikni gisepo maming ma·ekgrikani donggija jajrenganigri tom·tome kamtangko ka·na cholko on·agita Supreme Court-ni ge·etgimin niam ong·a ineba Subba agandapangaha.
