North Garo Hills a·jao dam 98 songrangna TB sabisioni naljoke dongna chu·sokgipa ong·anina mande ra·pilani chingita certificate-rangko aro Mahatma Gandhi-ni bronze statue-ko Mendipathar multipurpose co-operative hall-o District Tuberculosis Officer, Williamnagar-ni ong·atgipa program-o on·angaha. Re·anggipa salrangoba East Garo Hills a·jao dam 24 TB sabisioni naljoka man·gipa songrangko apsan daken mande ra·pilaniko dakangaha.
East Garo Hills Williamnagar-ni District Tuberculosis Officer, Dr. Chrissie Pearly M. Sangma, TB sabisioni naljokaniko mesokgipa ming 6 chinrango pangchakani bidingo sokbagiparangna aganangaha. Ia ming 6 chinrang National Tuberculosis Elimination Programme (NTEP) ni TB sabisiko bon·atna aro 2025 bilsi dipet TB-free ong·na re·mikkanganio pangchaka.
NGH-ni Deputy Commissioner AK Singh, program-o aganengon, health department aro bang·a manderangko TB sabisioni naljoke dongna kam ka·ahanina mittelani kattarangko aganangaha. Mikkangchi TB sabisioni bon·kame naljokna man·agita health department-ni kam ka·giparang aro songsalni bakrimna nangani gamchatanikoba ua talatangaha.
Ia program-o Ni-kshay Poshan Yojana-ni ning·o kam ka·giparang Ni-kshay mitras-rangkoba uamangni chakchikgija tangka paisanigita dangdike on·anina mittelpile mande ra·aniko dakangaha.
