West Garo Hills a∙jani Gambegre constituency-ni ning∙o donggipa Darengre oni Nengja Bolchugre ona tarigipa PMGSY rama namen nosto ong∙aniko man∙ani a∙selo a∙bildekrara dakani gimin songdongenggipa manderang aro skul bi∙sarang mi ge∙e mesokaniko dakangaha. Songni manderangni parakatanigitade ia PMGSY ramako tariani bilsisa mangmangni ja∙manoan nosto ong∙aniko nikna nangaha ine u∙iatangaha.
Ia rama bilonggen namjahani a∙selo Dilni Bolchugre skulo poraienggipa bi∙sarang re∙a doanio bang∙a neng∙nikaniko man∙tokenga ine parakataha. Uasan ong∙aigija jolo songdongenggiparang, office re∙giparang aro salantini nanganina bajar antiona re∙e koros ka∙gipa aro bading chiwalenggiparangba namen kosto ong∙tokenga ineba u∙iatangaha.
