Tura NEHU Campus-ko chalaianio bang∙a chu∙ongijanirang dongani bidingo aro Pro-Vice Chancellor ni biap ko adita somoirangna gapatgija donani gimin ta∙rakkale kamrangko ka∙nagita Conrad Sangma ma∙mong sorkariko didiangaha. Unbaksana bang∙a kamrang jekai skigiparang aro office-ni kamko ka∙giparangni biaprangko bangbang ong∙e dongenganikoba gapatna nanga ineba janapangaha.
A∙songo ra∙gatgimin New Education Policy-o pangchake aro poraienggipa chatro-chatri rangna namgniko ra∙banagita ma∙mong sorkariko Tura NEHU Campus-o dingtang dingtang Department rangko a∙bachengatna nanga ine Sangma aganangaha.
NEHU-o skia-poraianiko tang∙doatna tangka paisa chu∙ongijani aro skigiparangna somoigita promotion on∙a man∙jani a∙sel University chugipa gadangona tang∙donagita man∙jaenga ine Sangma aganangaha. Nangchongmotgipa nanganirang jean rama jal∙ang, ramani light rang, Hostel, Quarter aro namgipa Convention centre rang dongjani giminsa NEHU ja∙manchakrikenga ineba ua agandapangaha.
