Batanggimin August 9 tariko West Bengal, Kolkata ni R.G. Kar Medical College & Hospital o saksa me∙chik PG trainee doctor ko kragija til∙eke so∙ote galangani gimin Indian Medical Association (IMA) da∙al salo konta 24-na a∙song gimiko non-emergency aro OPD-o sanna bannanirangko dontongataniko dakangenga.
India a∙song gimiko sianggipa doctor ko kalstekgiparangko ta∙rake rim∙na nanga aro dos donggipa manderangko pulisrang bakan rim∙na nanga ine Indian Medical Association aro pilak doctor rang ku∙monganiko mesokna da∙al salo Emergency case rangna agre gipin sanna bannaniko dakjachina ja∙ku de∙angaha. IMA ni indake didiataniko man∙e an∙ching Garo Hills ni adita Hospital rangni mikkango sign board rango talataniko sea gnang manderangna u∙iatangaha.
Kolkata rape-murder case ko a∙bachengo Kolkata pulis dolrang jako ra∙e sing∙sandianiko dakanio maming ja∙ku de∙aniko nikna man∙jae, Central Bureau of Investigation (CBI) kamko an∙tangtangni jako ra∙angskaenga. Ia obostani bidingo aganengon West Bengal ni Chief Minister Mamata Banerjee, CBI ko ia a∙selni ja∙pangko am∙sandichina Robibar salni gisepo matchotatchina mol∙molan baksana dos donggipa manderangko pasi on∙chinaba dabiangaha.
