India a∙songni Vice President Jagdeep Dhankhar, July jani 4 tariko, chang 25 gipa Guwahati IIT ni Convocation ona re∙bae, UCC-ko ra∙gatani somoi sokaha ine uni agananio janapangaha. Ian constitution-ko bikotgipa pagitchamrangni chanchie donanggimin ong∙achim ine ua aganangaha. UCC ko a∙song gimiko ra∙gatna Article 44-o segimin niamrang gnang aro iako dakanio maming champengani dongjawa ine ua parakangaha.
Ia bill-ko ra∙gatna jotton ka∙anio mittam manderangni iani bidingo ong∙gija chanchianirangko nike anga aiao inmana ine Jagdeep parakaha. Politician ba a∙dokko dilenggiparangni chanchianiko a∙song aro a∙songni namgni baksa maming tosusaani dongja ine Vice president aganangaha. UCC ko ra∙gatanichi a∙songna ku∙mongani aro ku∙cholsan ong∙aniko ra∙bagen ine ua u∙iataha. Iako ra∙gatna ja∙manchakode a∙songni gamchataniko nosto ka∙ani ong∙enga ineba ua agane on∙angaha.
