Da·al salni bako Tura Sangsanggre, College of Community Science CAU (I)-o Techno Incubation Centre for Jackfruit Processing-ko oprake on·angaha. Ia centre-ko a·dok sorkarini 6 July 2018 bilsio a·bachengate on·gimin Mission Jackfruit-o pangchake ra·baaha jeon te·brongoni cha·ani ringani bosturangko tarichakanggen.
Da·alni program-ona Manipur, Imphal Central Agricultural University-ni Vice-Chancellor Dr. Anupam Mishra aro West Garo Hills a·jani Deputy Commissioner Jagdish Chelani (IAS) mongsonggipa sokgipa ong·e bakrimangpaaha. Meghalaya a·dokni Food Processing Directorate, B. Mylliemngap, Tura, CSS, CAU-ni Associate Professor Dr. Natasha R. Marak-ba tom·bimonganio bakko ra·angaha. Una agreba ia somoio bang·a chatro chatrirang, gital aro gitcham entrepreneur ba pale sim·e cha·giparang, skigiparang aro Garo Hills-ni a·ja dam 5 ni dingtang dingtang department-ni dilgiparangba sokbae bakko ra·angtokaha.
Ia jackfruit processing unit-ko te·brongko ge·e game, pale sim·e cha·giparangna, Self Help Group-rangna, Co-operative society-rangna dakchakna aro uamangni janggi tangani gadangko ra·donagita miksonge a·bachengataha. Iano te·brong biteoniko bang·a cha·ani bosturangko tarina miksonganirang gnang jekai te·brong chips, flour, powder, squash, pickle, jam, jelly ba indakgipa bosturangko name tarienba an·chingni a·doko aro a·songni gipin biaprangona wate badingna miksonganirangkoba aganangaha.
Da·alo processing unit-ko oprakani somoio a·dokni Chief Minister Conrad Sangma sokbae bakko ra·ena man·jaoba, ua video message-ko watatenba oprakaniko chu·sokgipa ong·atanina pilak bako donggiparangko gisiko nange kam ka·anina mittelpilangskaaha. Unbaksana ia processing unit Garo Hills-o game ge·e cha·gipa pilaknan dakchakgipa ong·gen aro uamangni janggi tangani gadangko ia unit-nigita ra·dona man·gen ine Sangma ka·dongsoani kattarangkoba aganangaha.
