Batanggimin somoirango Winter Capital-ni bidingo Tura songjinmao Chief Minister Conrad Sangma baksa golpogrikaniko dakangaha. Ia tom·anio adita chanchirimaniko dakange Office-nigita ka·donganiko on·anggenchimoba da·ona kingkingba maming ja·ku de·anirang dongkujanina Garo Hills-o songdongenggipa manderangni palo, A·chik Conscious Holistically Integrated Krima (ACHIK) a·dokni skotong Minister Conrad Sangma-na Deputy Commissioner-nigita chittiko see mol·molataha.
Tura-ko Winter Capital songanian A·chik jat sakantinan gamchatgipa ong·a aro iani bidingo dontonggija Memorandum-rangkoba on·angaha. Winter Capital-ko ra·bana man·genchimode sorkarini kamko jakkandilanio namdapaniko ra·baanisan ong·aigija a·dokni pilak bakrango apsandaken namroro aro silroroani kamrangko sokatna dakchakaniba ong·gen ineba ACHIK dolrang janapataha.
ACHIK dol re·anggipa bilsio Tura-o Winter Capital-ko songe on·chinagita sal 14 mangna okgimu chake dabianiko dakangaha. Ia dabiani bidingo chanchirimaniko dakanichi sorkarini gisiko nange kam ka·aniko nikan baksana Garo Hills-ni manderangna ka·donganikoba ra·bana amgen ine janapangaha. Winter Capital-na dabiani bidingo nanggipa ja·kurangko de·e chanchirimanirangko ta·raken a·bachengatchinagita ACHIK dolrang skotong Minister-ko mol·molataha.
