South West Garo Hills-ni District Administration Meghalaya Right to Public Services Act, 2020-ni bidingo awareness program-ko Ampati Degree College-o ong·atangaha. Ia program-o Ampati Degree College-o poraienggipa chatro chatrirang aro skigiparang dongpae bakko ra·angtokaha. Ia program-o manderangna dangdike on·anio Act-o dongimin niamrango ja·rike aro kamko ka·na bil gnanganiko u·ie ra·na nanganirangko agantalate on·angaha.
Ia program-o sak 5 manderang mongsonggipa ong·e skie on·aniko dakanggiparangara a·jani Additional Deputy Commissioner (ADC) sakgni Dr. R Ch. Marak aro Dr. W C R. Marak, District Informatics Officer E A. Marak, Labour Department-ni Labour Inspector Dibyajyoti Hajong aro District Transport Office-ni Motor Vehicle Inspector R. A. Sangma dingtang dingtang niamrangko ning·tue agantalatangan baksana ia niamrangko jakkale maikai songdongenggipa manderang namgniko man·ani bidingo skie on·angaha.
Ia program-ko ong·atani mongsonggipa miksonganiara Meghalaya Right to Public Service Act, 2020-ni gimin ma·sie ra·china jeon ge 188 sorkarini department-rango manderangna dangdike on·enggiparang dongimin somoio chu·sokatna nanganiko talatani ong·a. Ia program-o bakko ra·giparangna kakket ong·e niamrangko ja·rike, dangdike on·anio bilko jakkalna man·ani aro kamrangko ru·utatani ba jechakaniko ja·ku de·e kamrangko ka·na man·ani bidingoba aganangaha.
Una agreba a·jao songdongenggipa manderangna sorkarini dangdike on·ani kamrangko namdapatna aro kakketo sakantinan talbate u·iate kam ka·na nanganiko mesokna cholko on·a miksonge ia awareness program-ko ong·atangaha.
