Voice of the People’s Party (VPP) dolrangni da·o rikenggipa MDA sorkarini kosako tangka paisarangko kragija dake jakkalsretenga ine matnange agananina sorkarini ku·wattimgipa Dr. Ampareen Lyngdoh aganchakatskaaha. VPP dolrangko uamang an·tangtangni somoi sokaona sengchina aro da·o daito donge sorkariko rikna jako ra·enggipana somoiko on·chengkuchina Lyngdoh aganangaha. Uamangni somoirang da·o sokkuja ine Lyngdoh janapangaha.
Ian VPP dolrangni mamingba saki gri matnange jekoba agane ro·anisan ong·aigen, indake matnange agananichide kakket ong·aniko dingtangatjawa ine Lyngdoh aganangaha.
VPP dolrang political party-rangko matnange agane dongaigija an·tangtangni election-ni somoirango manderangna dakna ku·rachakgimin kamrangkosa on·kange ka·na nangenga ineba Lyngdoh aganangaha. Jaksi otnade altubea, manderangna aro manderang baksa kam ka·osa neng·nikanirangko ma·sia ine Lyngdoh agandapangaha.
