National Peoples’ Party (NPP)-ni National General Secretary, Sniawbhalang Dhar, gipin party-ni MLA-rang NPP dolona napaaniko maming champengsoani dongja ine aganangaha. Congress party-oni ong·kate NPP dolona napagipa MLA-rangni bidingo sing·aniko dakon, uamangko NPP party-oni dingtang mancha okama dongja aro bakrimchina maming mikbokate ropanirangba dongja ine Dhar aganangaha. Uamang sakgittam an∙tangtangni sikaniosa aro constituency-tangni namgninasa napaha ine ua parakangaha.
Apsandake, gipin party-ni MLA-rangni sorkariko chalaienggipa NPP party baksa bakrimaniara dingtang dingtang scheme-rangni namgnirangko man∙pana dakenga ine opposition dolrangni matnanganiko Dhar jegalangaha. Iani gisepon pilak constituency-on an∙tangtangni dabiatangko chu∙gimik man∙a amjagenchimoba, a∙dok sorkari nangnikanirangko chu∙sokatna rakken kamrangko ka∙enga ineba Dhar aganangaha.
