A·chik Conscious Holistically Integrated Krima (ACHIK) dolrang Garo Hills Autonomous District Council (GHADC)-o kam ka·giparangni man·a nanggni dormaharangko on·gija donenganina, GHADC-o kam ka·enggiparangni palo Chief Executive Member (CEM)-na chittiko see mol·molangaha.
GHADC-o kam ka·giparang ru·uta somoirangna dormaharangko man·jani dongengani a·selo uamangni nokdangrangko chalaianio bang·a neng·nikanirangko man·an baksana tangka paisa dongjae uamangni nanganirang jekai cha·ani ringani, dedrangrangko poraiatani, sanna bannani aro nok jamko nirokanio namen neng·nikanirangko chagrongna nangenga ine ACHIK dolrang janapangaha. Indake uamangni man·gni dormaharangko tik ong·gija on·anirangan gisiknigita bilgrianiko on·an baksana uamangni kam ka·anirangoba nambate dangdike on·aniko ra·onaona sokatenga ine ACHIK dolrang janapataha.
GHADC ge·sa council ong·e manderangna namgniko ra·bana niamrangko ja·rike, council-o kam ka·giparangna somoigita dormaharangko on·a nanggipa ong·a. Indake dormaharangko on·gija donchipaniara niam pe·anisan ong·aigija GHADC-o kam ka·giparangni council baksa bakrimanikoba ka·dongna man·gijaona ra·baani ong·a ine ACHIK dolrang janapangaha.
Ia pilak chagrongenggipa obostarangko niate ru·uta somoirangna on·gija donenggipa dormaharangko on·china didiangaha. Una agreba kam ka·enggiparangna somoigita dormaharangko on·anichi uamangni dangdike on·aniko namdapatna man·agita aro dilgipao ka·dongna man·agita ta·rake nirokatchina ACHIK dolni President aro General Secretary mol·molataha.
