Rongjeng Regional Unit-ni AHAM dolrang, Rongjeng constituency-ni ning∙o dingtang dingtang project-rangko chu∙sokatgija galchipe donenganina, kam ka∙anirang namjanina aro adita nanganirangni bidingo janapate Chief Minister Conrad Sangma-na chitti sedoangaha.
Skanggipao Rongjeng damsa Civil Sub-Division ong∙genchimoba mini-auditorium dongjani a∙selo Rongjeng-o mini-auditorium-ko rike on∙chinagita AHAM dolrang chittio janapataha. Rongjeng-o mini-uaditorium-ko rike on∙genchimode jolni chamdamberang an∙tangtangni changa sapanirangko ranta ka·na dakchakan baksana department-rangnigita seminar-rangko, workshop-rangko, training-rangko aro dingtang dingtang program-rangko sokachaknagitaba man·gen ine AHAM dolrang u∙iatangaha.
Gnigipao Rongjeng Mejolgre Wancho-o rikgipa skul nokko contractor-ni namgijagipa bosturangko jakkalan baksana matchote rike on·jani gisepon department-oni nirok simsakgijanina aro Dambo Rongjeng L.P & U.P skul nokrangni obostarang namgijako simsakgija galchipe donaniko chittio janapataha. Una agreba ma∙mong sorkarini Rongjeng constituency-na PWD department-nigita chamatgimin PMGSY ramako contractor-rangni name tarie on∙gijani gisepon department-ni nirok simsakjani gimin PWD Minister-na changni chang u∙iataniko dakgenchimoba da∙onaba maming nirokatani dongkujaenga ineba janapangaha.
Apsandaken Rongjeng-ni ning∙o ong∙gipa songrango JJM scheme-ni kamrangko name ka∙jani a∙selo songni nokni manderang namen neng∙nikanirangko man∙e ia project jako ra∙e kam ka∙gipa contractor-rangni kosako bang∙a u∙iatanirangko dakgenchimoba nirok simsakani dongkuja ine u∙iatangaha. Ia janapatgimin pilak obostarangko nirokate Rongjeng jolo songdongenggipa manderangni namgnina kamrangko ta∙rakatchina Rongjeng Regional Unit-ni AHAM dolrang Chief Minister Conrad Sangma-ko mol·molataha.
