A∙doko na∙tok jilgiparangi janggi tangani cholko aro tangka paisa man∙aniko bariatna man·agita milsi pesusaatgiparang a·dokonikon brechina da∙al pringni Assembly session-o Lahkmen Rymbui a∙dok sorkariko didiangaha. Iako aganengon, bang∙a changon a∙dokni dingtang dingtang milsi pesusaatgipa dolrang bilsiprako ge 500 susaatanirangko ong∙atengon lakh 300 kg rangko Assam a∙doknikosa bree ra∙barongenga ine Rymbui janapangaha.
Iani bidingo Chief Minister aganchakengon, sorkarini dingtangmancha niamrangko ra∙gata dongkujani gimin batanggipa somoirango milsi pesusaatgipa dolrang District Commissioner-ni hukumko man∙esa susaatanirangko ong∙atrongaha. Indake ong∙engon, milsi pesusaatgiparangna aro pena re∙bagiparangna maming dake noksan ong∙atgija mikkangchi sorkari nanggipa niamrangko ra∙gate a∙dokni na∙tok jilgiparangniko bree susaatanirangko ong∙atchina didianggen ine Chief Minister aganangaha.
Unbaksana manderangna cha∙na sokatna a∙doko 12,000 Metric Ton (MT) na∙tokrangnigita komianiko nikna man∙enga jean gong 240 crore tangka paisanigita ong∙a. Una agreba bilsi gimiko a·doko na·tokrangko jakkalaniara 32,000 MT ong·enga aro a·doko na·tokko jilaniara chu·gimik 21,000 MT mangsan ong·aia jean gong 400 crore tangkarangnigita ong·a ineba CM agandapangaha.
