Meghalaya aro Assam a·dokni sima ari jolo donggipa dam 6 songrango meligrikgijani bidingo re·baenggipa October jao gnigipa Phase-ko a∙bachengate chanchirimna a·dokni Chief Minister Conrad Sangma aro Assam-ni Chief Minister Himanta Biswa Sarma kamrangko ka∙angenga ine u∙iatangaha.
Assam-ni CM baksa adita chanchirimanirangko batanggimin somoirango dakange, iani bidingo tom∙angna mikkang jao chanchisamsoaha ine Sangma Budbar salo kobor ra∙timgiparangna parakatangaha.
Sima arini mamlarangko olgrokatna ru∙uta somoirangna dongdikatani bidingo sing∙on, ia gnigipa phase-o ga∙akgipa songrango adita neng∙nikarang dongani a∙selo simsakbee kamrangko ka∙angna nangenga ine Conrad Sangma aganangaha. Unbaksana skanggipa phase-na bate ia gnigipa phase-ni kamrangna ja∙ku de∙anio namen neng∙nikbataniko chagrongengani gimin kraa bewalo namgrikatna man∙agita namen simsake aro chanchibewalesa ja·kurangko de∙na nangenga ine Sangma agandapangaha.
