Batanggimin salrango Comptroller and Auditor General (CAG) a·dokni Finance Audit Report-o Meghalaya a·dok tangkarangko sroe jakkalanio bang·a grorang dongaha ine parakatani ja·mano Chief Minister Conrad Sangma aro Finance department ni Commissioner & Secretary Dr. Vijay Kumar iani bidingo aganchakangskaaha. Sangma-ni agananigitade, Covid sabisini ja·manan Meghalaya a·dok ta·raken tang·doenga jeon 2028 bilsio USD 11.5 billion economy-ona sokdogen ine kobor ra·timgiparangna parakangaha.
Covid sabisini bilsirangko changalede a·dokni tang·doani 10.82 percent ong·enga aro ia tang·doaniko apsan ong·e rakkiangkuode Meghalaya a·dok 2028 bilsio USD 10 billion economy-ona sokdogen ineba Sangma aganangaha. Apsandaken 15th Finance Commission-ni somoirango power sector-ni dingtanganirangko niatgenchimode sorkarini grorangko 3.5 percent-ona ra·ona man·aha aro a·dok sorkari baditana tangkarangko sroe jakkalana man·a man·gijaniko ma·mong sorkari namen nigrikesa on·a ine Sangma aganangaha.
Iarangko aganengon 2021-22 bilsio a·dokni man·gnioniko ma·mong sorkarinina 654 crore tangkarangko on·pilskana man·aoni 2022-23 bilsio koela cho·anirangoniko kajina man·jani a·selo 44 crore-ona tang·onaha ine Sangma talatangaha. Una agreba ma·mong sorkari Covid sabisini ja·mano capital expenditure project-rangna Special Capital Assistance to States for Capital Investment (SASCI/CAPEX)-ko a·bachengataha jeon a·dokrang bilsi 50-na kingking maming interest-ko gamna nanggija tangkarangko srona cholko on·gipa ong·a. Indake a·dokni koros ka·anirangko namdapatna a·dok sorkari ia CAPEX-o pangchake tangkarangko namen jakkalan baksana CAPEX-ko a·bachengatani ja·manan ma·mong sorkari chang dokna bate bariataha jean 2020-21 bilsio 200 crore-oni 2023-24 bilsio 1293 crore-ona bariaha aro chu·gimik 2823.28 crore ong·aha ine Sangma aganangaha.
Ma·mong sorkarini aro CAG-ni Meghalaya a·dokni tangka jakkala ba grorangko chane agangenchimoba ian bilsi 50-na maming interest gri tangkarangko srona on·gipasa ong·a jeon a·dokni GSDP aro grorangko changalesa kakketgipa sakkirangko on·a nanga ineba CM Conrad Sangma agandapangaha.
