India a·song gimiko September 5 tarik chong·motan gitcham President Dr. Sarvepalli Radhakrisnan-ni atchiani salko gisik ra·e Teachers’ Day ba skigiparangni sal ine done manirongbaenga. Ia salko 1962 bilsio Dr. Sarvepalli Radhakhrishnan-ni atchiani tariko, uni chatro chatrirang uko grongna re∙bae uni atchiani salko manina ku∙monganiko on∙on, Sarvepalli September 5 tarikko dingtangmancha skigiparangni sal ong∙e maniangchina didiangskaaha. Ua salonin da∙alona kingkingba Sarvepalli-ni atchiani salko gisik ra∙jolagita aro skigiparangna mande ra∙aniko mesokna pangna bilsian a∙song gimiko manibaenga. Da·al salo Garo Hills-oba a·jaantini skul aro college-rango skigiparangko mande ra·e dingtangmancha maniangtokaha.
Ia chang 63-gipa Teachers’ Day-ko Tura songjinmani District Auditorium-o Dr. Sarvepalli Radhakrisnan-ni nama kamna mittelpilna aro skigiparangni on·gilaniko mande ra·na West Garo Hills-ni Education department program-ko ong·atangaha. Program-ona MBOSE-ni Executive Chairman, C. P. Marak, retd. IFS mongsonggipa ong·e sokbaaha. Unbaksana bang·a songjinmani skul aro college-rangni chatro chatrirang, Principal-rang, skigiparang, officer-rang aro gipin dal·dalgipa manderangba sokbatokaha. Ia program-o adita skigiparangna 2024 Teacher award-koba on·angjolaha.
Shillong songjinmao, Chief Minister Conrad Sangma, a·dokni adita skigiparangna State, District aro Special Award-rangko on·angskaaha. Ia namgipa cholna ua katchaaniko parakate, award-ko man·gipa skigiparang uamangni kamo bimchipgipa, chatro chatrirangna on·kanggipa aro seng·aniko mesokgiparang ong·a ine aganangaha.
Da·alo apsandaken, Garo Hills-ni bang·a skulrangon ia salko skigiparangna dingtangmancha minge manianiko nikangaha. Skulrangosan ong·aigija college aro university-rangoba skigiparangko mande ra·e, chrok mesae, ring·anichi aro doka dam·anichi an·saobee maniangtokaha.
