Meghalaya a∙dokni non-government college-o skigiparangna Contributory Provident Fund ko jasani gisepo ra∙gatchina Meghalaya High Court a∙dok sorkarina ge∙etaniko on∙angaha. Meghalaya College Teacher’s Association (MCTA) ni dorgasto galanio pangchake, division bench ni Acting Chief Judge Hamarsan Singh Thangkiew aro Justice B Bhattacharjee ia ge∙etaniko on∙angaha.
Batanggimin May 30 tariko division bench-ni on∙gimin ge∙etanio pangchake, mijal salo ong∙atgipa hearing-o Education Department-nigita report-ko on∙angaha ine Advocate General Amrit Kumar u∙iatangaha. Indiomangba, court-ni on∙gimin report-ni paragraph 12-o segatgiminko niatgenchimode Centralised Provident Fund account-ko kulina da∙o dipet a∙dok sorkari aro State Bank of India (SBI)-ni gispeo maming soi ka∙grikani dongkuja ine MCTA-ni lawyer R Mazumdar raken jegalangaha.
Iani bidingo Advocate General ni aganchakanigitade, pilak ka∙na nanggipa kamrangko kraagitan ka∙angenga jekon jasani gisepo matchotatna High Court order ko on∙angaha aro re∙baenggipa October 1 tariko gitagipa hearing-ko ong∙atnaba tik ka∙angaha ine aganchakangskaaha.
