Garo Hills Autonomous Council-o kam ka·enggipa Non-Gazetted Employees Association (NGEA)-rangna 4th pay commission-niko jagittam mangni dormaharangko on·chengna aro uamangni dabiagita 5th pay commission-ko 2025 bilsioni a·bachengatna GHADC-ni tik ka·aniko NGEA ra·chakna man·jae jegalangaha. Da·alo GHADC-ni CEM Albinush R. Marak, Deputy CEM Nikman Ch. Marak aro gipin MDC-rang NGEA-ni jingjengatchakenggipa Tura Govt. College kal·chakram a·damona re·bae uamangni ja·ku ga·aniko janapeon 5th pay commission-ko nangnikaniko NGEA chrike mikkangon bilake dabiangaha.
NGEA-ni President, Brithen M. Sangma-ni agananigitade, ian ru·utbea salrangoni dabienggipa aro darangnin nangnikani ong·ani gimin dabianiko dingtangatna man·jawa ine parakangaha. Bang·ako on·a man·jagenchimoba 5th pay commission-niko ja 1 mangniko on·china Sangma dilgiparangko mol·molataha. Apsandaken, uamangni dabianirangko knachakja ong·ode silent sit-in demonstration-ko dontonggija dakangkuna miksonganikoba ua janapangjolaha.
5th pay commission-ni dormahako on·china 2018 bilsionin dabibaenga jekon GHADC-ni dilgiparang tangka paisarang man·ani baridapo on·a ku·rachake NGEA-ko chakchike sengkuchina aganaha. Ua somoioni da·o bilsi 4 ong·pilonaba ku·chakaniko chu·sokatjaha aro ku·sik waringchi changni chang dabigenchimoba maming ja·ku de·ani dongjani a·selo NGEA ku·cholsan re·mikkangna tik ka·angskaaha ine Sangma parakangaha.
Uamangni dabianiko chu·sokatna GHADC-o nipilna nangani kamrang dongkuenganiko dilgiparangni janapani gimin sing·on, indita bilsina kamrangko apsan ka·baenga jekon ka·manchaode matchotmangnokchim ineba Sangma agandapangaha.
