Da∙al salni bako PASF-Abong Noga College, Tura-na People’s College Grant-In-Aid Scheme-ni Handing over Ceremony-ko Working Women’s Hostel AB Mission compound, Tura-o ong∙atangaha. Ia tom∙bimonganiona Meghalaya Legislative Assembly-ni Speaker Thomas A. Sangma aro Education Minister Rakkam A. Sangma mongsonggipa ong∙e sokbae bakko ra∙angaha. Ia tom∙bimonganio PASF-Abong Noga College-ni chatro chatrirang gitrangko ring·e re∙bagipa sakantikon rimchaksoaha. PASF-Abong Noga College-na jaksrambee dangdike on∙gipa dilgiparangko aro mongsonggipa ong∙e sokbagipa manderangko college-ni skigiparang mittelpilskaani kattarangko aganangaha.
Ia somoio Education Minister Grant-In-Aid Scheme-na sorkarini ra∙chakgimin lekkarangko PASF-Abong Noga College-ni dilgiparangna pakwate on∙angaha. Chatro chatrirang dal∙gipa ba chongipa institution-rangosan poraie chu∙sokgipa ong∙na man∙ja indiba an∙tangtangni gisik nanganio aro bimchipanichisa dal∙gipa gadangona sokdona ama ine Rakkam Sangma ku∙pattiangaha.
Garo Hills-o Matric porikkarango pass ka∙ani percentage-rang namen komibeanina uni suk ong∙gijaniko parakange mikkangchi chadamberangko janggi tanganio namgipa gadango chu∙sokatna skigiparang aro ma∙apaarangko daitoko ra∙e nirok simsakchinaba didiangaha. Unbaksana Education department ni ki∙taprango QR code-rangko ra∙gate on∙anichi chatro chatrirang uko scan ka∙e dingtang dingtang subject-rangni nanggipa skianirangko mikkangchi talbate ma∙sina cholko man∙anggen ineba Education Minister aganangaha.
Bon∙kame, kamna rimnapa man∙gipa sak 22 Lecturer ba skigiparangna appointment Letter-rangkoba sualangjolaha.
