South Garo Hills Gasuapara-oni km 5 mang chelao donggipa Cherengpara songo a∙no donggipa me·chikma saksako salangenggipa ambulance gari rama namjani a∙selo kontasana batpile naptome dongaha ine koborna parakataha. Ia me·chikmako sanna bannaniko dakna gita Baghmara-oni Tura ona salangmitingo Cherengpara songon gari naptome dongna nangao ga·akaha ine Dalu Unit-ni AHAM dolrang aganangaha.
Adita somoirangni ja∙mano manderangni dakchakanichi gariko saldona man·genchimoba sa·gipa me·chikma bilongbee saaniko man·e an·chi jokruraaha ine u·iataha. Ia rama namjani a·selo sanna bannaniko dakna re·gipa ambulance garirang bang∙a changon neng∙nikanirangko chagrongna nangao ga·akenga. Unbaksana battanggimin salrangoba salantio re·ruragipa bus gariba ia apsan biapon a·sel ong·aha ineba aganangaha. Mikkangchi indakgipa obostarangko chagrongna nangjana gita ta∙raken nirokataniko dake ramako tarie on·china sorkariko Dalu Unit-ni AHAM dolrang mol·molataha.
