Education Minister Rakkam Sangma, matchuko chel·chakenggipa dolrangko poraia skia donggijagipa aro miksonganirango nosto ka·na rikgipa ine parakangaha. Sangma, uni agananio uamangko constitution-ko u·igijagipa jean India-ni gipin a·songrang baksa dingtanggrikaniko ma·sigijagipa aro niamrango pangchake namnika toromko ja·rikna man·aniko u·ina ja·manchakgiparang ong·e ine aganangaha.
Ia manderang extremists ba miksongatangko chu·sokdraatna am·enggiparang aro Hindu ine okamna kragijagiparang ong·a. Sangma, matchuko uni cha·na namnikbatsranggipa be·en ong·aniko parakate, toromko cha·a ringani ranta baksa nangbrinatjachina aganangaha. Iamang India a·songni manderang ong·na kraja aro uamangko buringrangosa dona nanga. Unbaksana darangba uko namnikatang be·en cha·aniko dontongatna man·jawa ine Rakkam Sangma parakataha.
