Da·al salo Tura sonjinmao donggipa Gandrak Dareoni jokbaenggipa Ringre chiringko Tura Municipal Board (TMB) baksa adita dolrang bakrime rongtal an·talataniko dakangaha. Ian Swachhata Hi Seva 2024-o pangchake September 17-oni October 2 tarikona a·song gimiko rongtalataniko dakenggipani bak ong·a jekon Tura Municipal Board ka·dilangaha.
Ia rongtalataniko pring 9 bajimangoni a·bachengataha jeon adita bakko ra·giparang jekai FKJGP, A·chik A·song Environment Enthusiast Society (AAEES) aro Tura Government College-ni adita chatro chatrirang gisiko nange kamko ka·angtokaha. Uamang Adinggre gittimoni a·bachengbae Ringrey be·en paldamona chiring joljol jabolrangko rongtalataha. Chiringrangko rongtale rakkina, ia ja·ku ga·anio sak 40 mangna bate bakko ra·angtokaha. TMB, dingtangmancha sakanti sokbagiparangna jabolrangko galna glove aro jutta ro·giparangko on·e dakchakangaha.
TMB-ni dilgipani agananigitade re·baenggipa chango Tura antidamko jokpakenggipa Rongkon chiringko rongtalatna miksongenganiko u·ina man·angaha. Ian mingsa nangchongmotenggipa aro mitchibatgiparangoni chiring dilsa ong·a aro ru·utgijaan ia chiringko rongtalatpilna ja·ku ga·anggen ine ua aganangaha.
