College of Community Science, CAU, Tura, chang 21-gipa Foundation Day-ko mijal salni bako District Auditorium-o maniangaha.
Ia manianiona College of Community Science, Assam Agricultural University Jorhat-ni Dean Mamoni Das mongsonggipa sokgipa ong·e Community Science aro poraia skianiko songsalo nangchongmotani bidingo aganangaha. Deputy Inspector General of Police (WR), IPS, Raghavendra Kumar M.G, adita neng·nikanirang jekai cybercrime, pekatgipa bosturangko jakkalani, me·chikrang aro bi·sarangni kosako ong·gija dakanirangko simsaksoanide songdongenggipa sakantinin daito ong·a ine aganangaha. Tura-ni MCS, ADC Tengchi Margarette G. Momin poraia skianiko chugimik ong·e bil gnange songsalo dingtangatani gimin aganangskaaha.
Ia manianiona A·dokni dingtang dingtang department-rangoni official-rang, baksana Tura, BSF-ni DIG, Lalith Kumar Sharma, Tura-ni DFO Ganeshan, NEHU Tura-ni Dr. C.P. Suresh aro Dr. Gopal Shukla, Sericulture Officer Tura-ni Indira Kumar, college-ni skigiparang aro chatro chatrirangba dongpae bako ra·angtokaha.
Program-o agangipa sakantian chang 21-gipa Foundation Day-ko chu·sokatna man·anina aro College-ni namroro silroroanina on·gilanirangna College of Community Science Tura-ni Dean Jyoti V. Vastrad-ko demittelalangaha. Ia maniani bako jatni dakmesokani jekai git ring·ani, bi·sarangni ganding chindingrangko mesokani, jatni chrokani aro chatro chatrirang an·tangtangni changa sapanirangkoba mesokangaha.
Unbaksana, ia somoio Meghalaya State Badminton Championship 2024-o Under-13 Boys’ single Category-o Gold medal-ko man·e chebagipa Sixbirth M. Marak-koba mande ra·aniko dakangjolangaha.
