Da·al salo Meghalaya sorkarini cabinet tom·e adita gital niamrangko ra·gatangan baksana dingtangatanirangko ra·chakangaha.
Skanggipao, Meghalaya Excise Rule-ni ning·ao gital niamko hotel-rangna licence on·ani bidingo ra·chakangaha. Chong·motan, batanggimin chango F&B service-rangna jekai hotel, restaurant aro bar license-rangna dingtang galna nangani a·selo neng·nikanirangko chagrongna nanga. Uni gimin license-rangko on·aniko nambate chalaina, dongenggipa aro mikkangchi ra·bana am·enggipa 5 star hotel-rangko nigrike gital niamrangko cabinet ra·chakan baksana dingtanganiko dakangaha.
Gnigipao, Excise Department-ni pilak bosturangko chong·motan Meghalaya a·doko churangko palani bidingo real-time tracking ba pala sim·aniko nambate u·ibatna QR Code Tracking System-ko dakna ra·chakaha. Ia bosturango QR code hologram-ko tapanichi churangko joma ka·ani, bikotani, palaniko nambate u·ina man·gen aro unbaksana palanio kajina man·anikoba u·ina dakchakanggen.
Gittamgipao, Lt. Col. Shabestian Marbaniang (Retd.) ko Zila Sainik Welfare Officer, Shillong-na bilsi 5-na jako ra·e kamko ka·na cabinet seokangaha. Unbaksana, IPS, Heimonlang Nongpluh (Retd.) ko Human Rights Commission-ni Non-Judicial ni member ong·na seokaniko ra·chakaha.
Bon·kame, 2025 bilsina Meghalaya a·dokna holiday ba chuttirangko parakataniko cabinet ra·chake matchotataha.
