Lower Chitoktak Darenggittim songni manderang Antodaya Anna Yojna (AAY) aro Priority Households (PHH)-ni merongrangko sualgija donenganina matnangataha. Iani bidingo nambate ma·sibatna September 17 tariko, A·chik Dedicated Integrated Leaders (ADIL) dolrang manderang baksa tom·aniko dakangaha. Songni manderang baksa agangolpogrikon Public Distribution System (PDS) dealer, Triprecia Ch. Marak merongrangko jakkalsrete AAY aro PHH-ni on·a nanggnirangko sualgija dongenganiko u·ina man·aha.
Manderangna man·gnitangko suale on·jaengani gimin ADIL dolni Chairman, WGH-ni Deputy Commissioner baksa grongon iani bidingo nirokatna ku·chakangaha. Uamang Marak-ni kosako raka ja·kuko de·chinaba didiangjolaha.
Unbaksana, NREGS job card-ni ning·o bang·a project-rangko matchotgija donenganiko Songsak Jarepa VEC-ni matnangatani bidingoba ADIL dolrang Songsak block-ni BDO-na janapataha. Dingtang dingtang matchotkugija kamrang jekai nok 30-na cattle shed rikani, Jarepa-oni Chimirogre dakanggipa rama, community hall, pokri, Jarepa-oni Rongdolsa chiringona culvert tarigipa, Bolsalgittim-oni Jarepa B-ona RCC pavement rikenggipa, Nemgajeng chiringni dam aro Tebrong chiringko kasotgipa RCC check dam-ko chu·gimik ka·gija donenganiko BDO-na parakangaha.
Manderangni nanganina aro jakkaltona ra·bagipa ia project-rangko matchotatgija galchipe donani a·selo manderang neng·nikanirangko chagrongenganina ta·rake nirokatchina ADIL dolrang didiangaha.
