Don Bosco College Tura, re·baenggipa October 7-oni 12 tarikona Caritas Mymensingh Region, Bangladesh baksa bakrime Indo-Bangla Cultural Youth Camp-ko ong·atanggen. Ia camp-ko ong·atanichi a·song ge·gnini A·chik chadamberang saksa sakgipinoniko skie ra·na aro daka rikako agangolpogrike u·ie ra·na dakchakani ong·gen.
Chadamberang ia youth camp-o dingtang dingtang dakmesokanirang jekai jatni chrok mesaanirang, doka dam·ani, Garorangni ong·baani aro janggi tangani bewalko chanchirimanggen. Unbaksana, jatni ma·gitcham pagitchamrangni ring·anirang, kal·ani, doka dam·ani ostrorang aro India-Bangladesh o jatni daka rika bebe ra·anirangko dakmesokanggen.
Iasan ong·aigija, Tokbirim aro Nokpanteni bidingoba agangolpogrike saksa sakgipin baksa chanchirimaniko dakangnasienga. Adita salrangna ong·atenggipa Indo-Bangla Cultural Youth Camp-ni bako Garo Hills-ni nitoaniko aro jatni daka rikanio gamchatgipa biaprangkoba re·ange nianggen.
