Da·al attampangni somoio Chief Minister Conrad Sangma, WGH-ni District Administration aro MSDMA-ni official-rang baksa chi dal·anganichi aro a·arang ru·ronge Dalu C&RD block-ni ning·ao nosto ong·atako man·anggiparangni bidingo nipile chanchirimaniko dakangaha.
Uamangni golporime nipilaniko dakon Dalu C&RD block-ni ning·ao ge 2630 nokrang nosto ong·aniko aro sak 6 manderangni janggirang gimaaniko u·ina man·aha. District Administration, ge 68 relief camp-rangko tariangan baksana a·selo ga·akgipa manderangna dongchakna aro cha·ani ringani bosturangko on·angaha.
Ong·anggimin a·selrangko nipiltaie tom·ani somoio Chief Minister Sangma pilak official-rangko chibimarangko aro chi bana ong·ronggipa biaprangko porikka ra·e mikkangchi namdapatna, aro ja·kurangko ga·e naljoksona man·agita nirok simsakchina ge·etangaha. Unbaksana rama jal·angrangko ta·rake taripiltaina aro nanggipa bosturangko manderangona sokatchinaba Sangma didiangaha.
