Da·al pring 2 bajimangni somoio Tura super market-ni sepangjolo donggipa dokanrangko wa·al kame lakh-ni lakh damni bosturang nosto ong·aona sokaha. Tura SP, Fire & Emergency Services, Bruno A. Sangma-ni agananigitade ia a·selo chu·gimik ge 13 dokanrangko wa·al kamaha ine u·iataha.
Wa·al kamani ja·pangko da·o dipet name talatna man·kujaenga, bijolini a·selo ong·ani giminba janapa dongkuja. SP-ni agananigitade kama man·gipa dokanrang bang·bataan wa·al kamao simsakna nanggipa niamrangko ja·rikgijagiparang ong·a ine u·ina man·aha.
Wa·al kamna shanty store-rangoni ge·sa dokanoni a·bachengaha jean super market aro district council building nok sepangjolo donggipa ong·a. Adita dokanrangoni bretna altugipa bosturang dongani a·sel wa·al kamani batrikrikangaha aro super market-ni gnigipa gadango donggipa sepang jolni dokanrangonaba wa·al kamdoangaha.
Ia a·selo nisiata man·gipa dokanrangara Sinha clothes store, N Modok-ni electrical store (super market), Prodip Saha cha dokan, Santosh Sah fruit store, Amit Dey medicine store, Nirupom Roy jutta dokan, Nantu & Mintu Sarkar bag store, Arjun Prasad shoe store, Sanjay books stall, Gori dokan, teer counter, bus ticket counter aro gipinrangba kamchapa man·aha.
