East Garo Hills, Nengkra regional unit-ni GSU dol, Deputy Commissioner Vibhor Agarwal-ni jako Nengkra-oni Williamnagar-ona dakanggipa galchipgimin PWD ramako ta·rake tarie on·china Chief Minister Conrad Sangma-na chitti sedoataha. Ramarang namjani a·selo songni nokni manderangnasan ong·aigija chatro chatrirangnaba jekai Nengkra, Dobu, Chimagre aro gipin songrangna neng·nikaniko ra·baenga. Nangchongmote re·giparangnaba minute 20/30 ni sokna man·gipako minute 50-rang nangskae donsogimin somoio sokna man·jaenga ine GSU u·iataha.
Ramarang namjani a·selo be·gopna am·enggipa dolongrangna kenbegnigipa ong·enga. Mitam biaprango a·a rurongdapanina simsakaniko nangenga jekon retaining wall-rangko tarichina GSU didiataha.
Williamnagar-oni Dawagre songona dakanggipa km 7 mang ramako taria matchotnasioba Dawa Chipit antioni Nengkra A·we songona dakgipa ramakode tarina a·bachengkuja ine uamang u·iataha. Sakanti songdongenggipa manderangna maming neng·nikanirangko ra·bajachinagita ia PWD ramako ta·rake tarie on·china GSU dolrang Chief Minister Conrad Sangma-ko mol·molataha.
