North Eastern Hill University (NEHU) Tura Campus-o nanganirangko ta·rake nirokatchina aro UGC-ni dongimin niamko ja∙rike dakchina gita saksa social activist Cherian Momin Chief Minister Conrad Sangma-na memorandum-ko on·angaha.
NEHU ge·sa a·dokni bida pakwatchakram a∙damrangoni namen gamchatbegipa ong·an baksana chu∙bata gadango skie ra·na dakchakgipa ong·genchimoba NEHU Tura Campus-ni mingsing minggamanirang komianganiko nikna man·enga ine Momin aganangaha.
NEHU, University Grants Commission (UGC)-ni niamko ja·rike re·dilgipa ong·ani gimin dingtangmancha sason ka·ani bidingo jekai kam ka·rimskarangko nirok simsakani, chatro chatrirangna namgipa cholko on·a, rika cho·anirangko namdapataniko dakna UGC niamrangko on·genchimoba NEHU Tura Campus-o da·o ong·enggipa obostarangan namgija dakmesokaniko parakenga ine Momin aganangaha.
NEHU Tura Campus-ko nirokna gita Pro Vice Chancellor (PVC) ko bil gnange kamrangko ka∙angna niamrangko UGC-nigita ra∙gatgenchimoba “Campus Director” kosa songani gimin, Pro Vice Chancellor-gita apsangipa bilko ra·e kamko ka∙na on∙skaja ineba Momin agandapangaha.
Una agreba NEHU-o temporary aro neng·take dong·enggiparangni man·a nanganirangko apsangrik dake kraa bewalo ja·rike dakchina jekon Supreme Court-ni ge·etgimin gita ‘Equal pay for Equal Work” o pangchake on·chinaba Momin aganangaha.
Campus-ni ning·o canteen-rangni chu·onggijani, chatro chatrirangna aro kam ka·giparangna altue re·rurana man·a gita bus garirangko tik ong·e sokatchina, an·seng baljoke dongna gita rongtalgipa ringani chirangko on·china aro nanggitiko sanna bannaniko on·a man·a gita campus-ni ning·o health Center-koba on·china Momin janapangjolaha.
NEHU Tura Campus-o nanganirangko ta·rake nirokataniko dake namdapataniko on·china social activist Cherian Momin Chief Minister Conrad Sangma aro Education Minister Rakkam Sangma-o mol·molangaha.
