National People’s Party (NPP) dolrangni Manipur a·doko Biren Singh-chi dilenggipa BJP sorkarioni ong·katani ja·mano Tura-ni MDC aro BJP dilgipa Bernard N. Marak uamangko dakmikgipa ine matnange aganangskaaha. NPP dolni bakrimaniko Manipur-o inditana dal·e ra·a ong·ja aro nangchongmotgipa ong·ja ine Marak aganangkuaha.
Ian uamangni an·tangtangko BJP baksa bakrimanichi ong·gimin obostarango maming bak donggijaniko mesokna dakenggipasa ong·a. NPP dolni ong·katanichi BJP dol gimikna maming nangchakani dongjawa ine Marak parakangaha.
NPP dolrang Manipur-o BJP sorkari baksa bak ong·panaskesa nangrimaha, da·o uamangni bon·chotao ong·kate kataniko skanggipa salon ma·sisona man·a ine ua matnangangaha. NPP dolni name dakaniko nangaba ong·ja, uamang an·tangtangni man·gnina aro doltangni dal·roro bilakroroaninasa dakmike bakrimpaaha ine Marak agandapangaha.
