North-Eastern Hills University Students’ Union (NEHUSU) aro NEHU unit-ni Khasi Students’ Union dolrang okgimu chake jingjengatani sal 16 ga·tapani ja·mano dontongchina mol∙molanirangko man·e dikdiksa somoirangna dongdipchenga ra·chakangaha.
Ia ja·kuko uamang North-Eastern Hill University Teachers’ Association (NEHUTA) aro Meghalaya Tribal Teachers’ Association (MeTTA-NEHU), NEHUSU aro NEHU unit-ni Khasi Students Union baksa tom·ani ja·mano Vice Chancellor In-charge Prof. Nirmalendu Saha-ni dongpaanio dontongna tik ka·angaha. NEHUSU President Sandy Sohtun-ni u·iatanigitade uamang skigiparangni, staff-rangni aro Doctor-ni mol·molaniko man·e dontongna knachakaha ine aganangaha. Chatro chatrirangni namjabatroroenggipa be·en bimangni neng·nikaniko nike Doctor-rangba dontongchina ku·pattiangaha.
Indake ong·genchimoba, uamangni dabiagita chong·motan Prof. Prabha Shankar Shukla-ko VC-ni gadangoni ra·galja dipet sit-in demonstration-ko pring 9-oni 5 bajiona dakangkuna am·aniko Sohtun parakangskaaha. NEHU internal committee-ni Union Ministry of Education-ona watatnasienggipa report-ko uamang sengna miksongenga. Uamangni dabianiko chu·sokatna man·jaode aro ja·ku ga·anirang nangnikagita ong·jaode okgimu chakaniko dakangkunaba gnang ine Sohtun mikrakatangaha.
