NEHU-o ong∙enggipa obostarangni bidingo aro Vice Chancellor Prof. P B Sukhla-ni daka kamrangko nirokna Ministry of Education-ni bikotgipa committee, university-ona Robibar salo sokbaaha. North Eastern Hills University Students’ Union (NEHUSU) aro NEHU KSU unit re∙anggipa somoirango sal 16 mangna VC-ni daka kamrangko jegale uko ra∙galchina okimu chake jingjenganiko dakangaha. Ia obostarangko a∙dok sorkari aro chatro chatrirangni ma∙mongni Ministry of Education-na janapataniko man∙e committee-ko bosaina tik ka∙angaha.
Koborrangko man∙soanigitade committee-ko re∙dilna seoka man∙gipa sakgni member-rang da∙al salo NEHUSU, NEHU KSU unit, skigiparang, non-teaching staff aro gipin official-rang baksa agangolpogrikangna am∙enga ine u∙ina man∙aha. Uamang ia somoio university-ni ning∙o rika cho∙ani kamrangkoba an∙tangtang nie ra∙angnasienga. Uamang pilak ong∙enggipa obostarangko ma∙sie ra∙e salgnini gisepo report-ko tarina nangao ga∙akenga.
Committee-ni sakgni member-rang chong∙motan gitcham UGC Chairman Prof. DP Singh aro Assam University-ni gitcham Vice Chancellor Prof. D Chandra Nath, knal salo Delhi songjinmaona re∙ange report-ko tarienba Ministry-na pakwatanggen. NEHUSU aro NEHU KSU unit bang∙a manderangni jingjengataniko dontongchina didiako man∙e sal 16-ni ja∙mano okimu chake jegalaniko dongtipna tik ka∙angaha. Indake ong∙genchimoba uamangni dabiagita ja∙ku de∙anirang ong∙jaode aro VC-ko ra∙galjaode jingjengataniko dakangkuna mikrakani kattarangko batanggimin salrango aganangskaaha.
