Meghalaya a∙doko election-ni somoirango Hindutva-ko ra∙e BJP dolni kosako ong∙gija dake talatanina gipin political party-rangko BJP matnangataha. Toromko ra∙e BJP-ko ong∙gigija dake manderangna mesokaniko gipin dolrang silchidaregita jakkalanio Meghalaya a∙doko chu∙sokna man∙enga ine BJP-ni ku∙watimgipa Mariahom Kharkrang aganangaha.
Ia chang Gambegre bye-election o BJP dolo susagipa Bernard Marak-na namgipa result-ko on∙a man∙jaha jeon ua 710 vote-rangkosan man∙a amaha. Ian gipin dolrangni BJP-ni kosako toromko ra∙e kal∙chapanichi ong∙enga aro ian dolna nangchakenga ine Kharkrang parakangaha.
Indake ong∙genchimoba bang∙bata political party-rang Meghalaya-ko togrike BJP-chi chalaigipa a∙dokrangni tang∙doani bidingode janaptokja ine ua aganangkuaha. Ia tang∙doani aro dingtangani gimin gipin dolrang janapgenchimode manderang BJP dolna pu∙ongen ine Kharkrang janapangaha. Gambegre bye-election o kamrang ka∙anio ong∙gijanirangko aro party-ni dakgualanirangko ua parakange a∙doko campaign ka∙ani biding dingtangatanirangko ra∙bana nanggen ine ua agandapangaha.
