Mijal salo Rongram C&RD Block-ni Multi Facility Centre Asanang-o International Day for Older Persons-ko maniangaha. Ia program-ko West Garo Hills Tura-ni Social Welfare Department, “Ageing with Dignity: The importance of Strengthening Care and Support Systems for Older Person Worldwide” katta bichongko don·e ong·atangaha.
Program-ona Rongram C&RD Block-ni BDO Cherime R. Sangma mongsonggipa ong·e sokbaaha. Ia salko dingtang mancha bilsi re·angimin manderangni on·gilanirangko mande ra·na, uamangni neng·nikanirangni bidingo nirokaniko namdapatna aro mikrakatna, nokdangrangna talate on·a maniaha ine Sangma sokbagiparangna talatangaha. Bilsi sotdok batgiparangna sorkarini on·gipa scheme old age pension-ko ua janapange uamangni bilsokjao sorkarini dakchakenggipa pilak scheme aro sanna bannani cholrangko ra·china Sangma didiangjolaha.
Apsandaken, WGH Tura-ni District Social Welfare Officer, Madonna T. Sangma-ba dingtang dingtang scheme-rangko talate on·angaha. Bang·a sabisirangna jekai diabetes, hypertension, cancer aro uandake gipin saenggipa budepa buchumarangna koros gri sanne on·ani cholrangko sorkarini dakchakenggipani bidingo sakgipin medical official aganangskaaha. Ia program-o budepa buchumarangna boksisrang baksana tangka paisa nanga gri sabirangko porikka ra·e nianikoba dakangjolaha.
