Da·al salo ma∙mong sorkarini National Pharmaceutical Pricing Authority (NPPA), Ministry of Chemical & Fertilizers aro Introduction of Pharma Sahi Daam-nigita “Regulation of Prices”-ni bidingo salsana seminar-ko Mission Compound Tura-ni Working Women’s Hostel-ni seminar hall o Meghalaya State Price Monitoring and Resource Unit (MSPMRU) ong·atangaha.
Bosturangni damrangko u·ina gita samrangko palgipanasan ong·aigija bregiparangnaba samrangni damrangko ma∙sie ra·na dakchakan baksana samrangni sal ba somoirangni giminba “Pharma Sahi Daam” mobile application-nigita bregiparangna adita samrangni company-ni bidingoba u·ie ra·na dakchakanggen ine Garo Hills Division-ni Health Services-ni Joint Director Dr. S Boro aganangaha. Unbaksana samrangko bre·engon Doctor-rangni on·gipa prescription ba see on·gimin lekka gri bre·e jakkalgenchimode ian been bimangna kenbeaniko ra·baani ong·gen aro samrangko breengon uarangni damko, niamko mesokani, tariani tariko, nosto ong·ani tarikoba brena skang name nichengna gita aganangaha .
MSPMRU-ni Field Investigator Bethsebha Nongrum Regulation of pricing-ni National Pharmaceutical Pricing Authority (NPPA), Introduction to Pharma Sahi Daam, Drug Regulatory System in India, National Pharmaceutical and Pricing Authority (NPPA) ni niksamsoe kam ka·ani aro bregiparangna mikrakatani on·ani bidingo aganangaha.
Ia program-ona West Garo Hills-ni District Medical and Health Officer Dr. Jakrambal A Sangma, MSPMRU-ni Project Co-ordinator Mebatyngshain Siangshai, WGH Tura-ni Drugs Inspector Asley Chibasal Ch Marak-ba ia tom·anio agan ku∙pattianiko on∙angaha. West Garo Hills-ni SDM & HO, Dr. Silang R Sangma, pharmacist aro chemist-rangba ia program-o dongpae bakko ra·angaha.
