Re·baenggipa November 29-30 tariko, WGH Jengjal Baljek-o 4-gipa Me·gong Festival ong·nasiengani gimin dal·dalgipa axle ge·gni donggipa jekai truck, lorry, trail gnanggipa aro uandakgipa apsan garirangko, District Magistrate Section 163 BNSS bilko jakkale NH 51 ramao Snalgre-oni Tura-ona knal sal attam 6 bajioni a·bachenge December 1 tarik pring 6 bajiona re·ruraaniko dontongchina ge·etataha. Ia niamko Me·gong Festival-ni somoio manderangko naljoke rakkina aro tom·tome re·rurana man·agita ra·gataha.
NHIDCL aro P.W.D department-koba Snalgre aro Tura-ni bichangchio dingtang dingtang rika cho·ani kamrangko ka·enganiko ia janapgimin sal aro somoio dontongchina u·iataha.
Ia niamko saoba pe·genchimode dosi dakgipani kosako Section 223 BNS aro gipin niamrango pangchake ja·kuko ga·angnaba parakataha. Indake ong·genchimoba nangchongchongmotgipa garirang jekai ambulance, fire service aro police-rangna ia niamo changalani gnang. District Magistrate, dingtang mancha daito ga·akgipa officer-rangko aro department-rangko nanggipa ja·kurangko ga·china aro nirikigipa a·damrangko rakkichina didiataha.
