A·dokni Reservation Policy-ko nipilnagita bikotgipa Expert Committee-ni public hearing-ko ong·atanio Garo Reservation Policy Coordination Committee (GRPCC) an·tangtangni nangnikatangko mikkango done grongangaha. Uamang ia reservation policy-ko jekai 1972 bilsioni ja·rikbaengagitaan dingtangatgija apsan donchina Expert Committee-ko mol·molangaha.
GRPCC-ni dilgipa aro gitcham GHADC-ni CEM Purno K. Sangma, Garorang batanggimin bilsirango 40% ona gapdona neng·nikaniko aganangaha. Garo National Council (GNC) dolnigitaba uamang Expert Committee-ko grongaha. Ian gitchamgipa dol ong·e Lt. Captain Williamson Sangma-ni ua somoionin reservation policy-ko a·bachengdilgipa ong·ani gimin namen biljrimgipa ong·a jekon knachakna nangchongmota ine Purno K. Sangma aganangaha.
GRPCC-ni President, Dr. Merryl N. Sangma, General Secretary, Rev. Insting C. Marak, Convenor GRPCC, Roger Benny A. Sangma, Professor-rang, Ph.D scholar aro gipinrangba ia somoio bakko ra·angtokaha.
