Assam a·doko matchu be·en cha·aniko champengna adita beng·anirangko Assam Cattle Preservation Act, 2021-ni ning·o gital niamrangko Assam sorkari ra·gatangaha. New Delhi-o tom·ani ja·mano ia niamrangko a·dokni cabinet ra·chakenba hotel, restaurant, jinma tom·anirango aro manianirango matchu be·enko cha·jachina beng·ataha.
Assam sorkari ia Act-ko 2021 bilsio matchuko aro gipin jila kaa matburingrangko so·otaniko champengna bikotaha. Chief Minister, Himanta Biswas Sarma-ni agananigitade ia niamo adita chu·onggijanirang dongani gimin gital niamko ra·gatna nangaha jekon Congress-ni dilgipa Bhupen Kumar Borah and MP Rakibul Hussain-ni agananirango pangchaka gnang re·mikkangaha ine u·iataha.
Ia Act-ni ning·o a·bachengonin niamrang rakgenchimoba, manianirango aro hotel-rango matchu be·en cha·aniko champengani dongkuja jekon ia chu·onggijaniko kolgapataha ine Himanta Biswas Sarma parakangaha.
