EGH, Deputy Commissioner-ni ge·etagita kamrangko ja·rikgija ka·engani gimin FEDCO Sub-Divisional Manager (SDM), Nongalbibra aro Dambo Rongjeng C&RD Block-ni BDO-ni kosako Wakchikong songni Cleverson Sangma, kusi ong·gijaniko parake DC-na lekkako sedoaha. Pilak dakna nanggnirangko DC an·tangan October 9 tariko tal·e u·iatahaoba iamang sakgni Officer-rang ge·etgimingita dakjaha ine Sangma u·iatangaha.
FEDCO-ni SDM jagni ong·piloba ge·etagita kamrangko ka·jaenganiko Sangma matnangatenba ian DC office-ko mande ra·gijani ong·a ine parakataha. Apsandaken, BDO-ni kosakoba ua niamgita ja·rikgija dakengani gimin u·iatangaha. Batanggimin November 19 tariko DC-na lekka see uni kamni bidingo janapahaon Sangma-ko uni office-ona okamate jinmani mikkango namgijadake kratchaataha ine ua aganangaha. Ian unasan ong·aigija jatnaba rasong be·ani ong·a ine Sangma aganangkuaha.
Sangma uni chitti sedogipao, gitcham Nokma Mantharam G. Momin-ni Rongjeng Chijong Gittim-na ong·gija map tarigipako janapataha. Ia ong·gijagipa map-o Awangga, Wakchikong aro Chijonggittim-rangko man·chapataha jean GHADC aro Rongjeng Village Court jegalgiminba ong·a. Rongjeng Dambo C&RD block-ni gitcham BDO, ia map-ko jakkale 2018 bilsionin bang·a sorkari scheme-rang jekai NREGS aro Saubhagya scheme-rangko kam ka·aniko Sangma talatangaha. Da·o apsandaken gital BDO-ba ia map-ko jakkale an·tangtangni man·gnina kamrangko ka·kuenga ine ua aganangaha.
Ia pilak ong·gija dakanirangko DC-na ua parakate ta·rake nirokatchina Sangma janapataha. Ian song ge·sa ba mande saksanasan ong·aigija daito gnanggiparangni kam ka·aniko nambata gadangona ra·doate manderangni namgnina naljokani ong·gen ine Sangma parakataha. Iani bidingo songni manderangba jegale sorkari official-rangni kosako raka ja·ku de·aniko dabiangtokaha.
