Mijal salni bako Health and Family Welfare Department-ni Health Expert Committee-rang Principal Secretary-ni dilanichi Human Metapneumovirus (HMPV) sabisini bidingo tom·e chanchirimaniko dakangaha. Ia sabisioni naljoke dongna tarisamsona gita State Health Machinery-rangkoba committee-rang aganangaha.
Human Metapneumovirus (HMPV) gitalgipa sabisi ong·jani gimin manderang kenjagokna nangja maina ia sabisiko batanggimin 2001 bilsirangon a·songo giproroaniko parakataha ine Committee -rang u·iataha.
Re·anggipa 2024 bilsini December jao a·song gimikoni sak 714 HMPV sabisina chanchichipaniko man·giparangoni sak 9 san HMPV positive-ko man·aha aro janggi gimaataniko ba siani report rang dongja ineba aganangaha.
Human Metapneumovirus (HMPV) sabisini chinrangara be·en ding·e saani, gusu, gitoko saani aro soldi man·anian ong·a. Ia sabisioni naljoke dongna gita manderangko an·seng baljoke dongna man·agita jakrangko jaksujringna nanganiko aro mande jinmarango mask-rangko ganchinaba committee-rang aganangaha.
Integrated Disease Surveillance Programme (IDSP)-nigitaba manderangna an·seng baljokaniko on·a kamko ka·angna aro ia sabisini giproroaniko champengna a·doko sanna bannani bosturang chu·ongagita donganikoba committee-rang parakataha.
