Williamnagar songjinmani Civil Hospital mikkango donggipa dokanrangko da·al pring 5 bajimango wa·al kamaha. Ia obostani ja·pangko bijolioni wa·al chaani a·selo ong·aha ine nikgiparangoni agananio u·ina man·aha.
Wa·al kamani pring 5 bajina skang cha dokan ge·saoni a·bachengbaaha ine nikgipa dokan nokgipa saksa aganaha. Agananigitade, bijoli silitingoni wa·al kamna a·bachengako nikgenchimoba dakchakgipa dongjaesa wa·alrang dokan ge·saoni ge·gipinona batrikrikangaha.
Ia a·selo dokan ge 10 mangrangnigitade nosto ong·atako man·aha. Kamgimin dokanrang gue keli, cha dokan aro nongani sittani dingtang dingtang bosturangko palgipa dokanrang ong·a.
