UCC ko a∙songo ra∙gataniara Northeast-o songdongenggipa manderangni gitcham dakbewal rikbewal aro dingtanggipa daka-rikanirangko gimaataona sokatgen ine Garo Students’ Union (GSU) dolrang raken jegalangaha.
UCC ni bidingo Northeast a∙dokrangna neng∙nikanirangko ra∙baaniko dingtang mancha chanchirimaniko Union Minister, Kiren Rijiju ma∙mong sorkari baksa chanchirime dakna nanga maina uaba Northeast jolni dilgipa ong∙e warachakgipa ong∙na nangachim ine GSU ni President Tengsak G Momin-ni parakataha.
Rijiju an∙tangan saksa tribal mande ong∙e chengo ma∙gitcham pagitchamrangni dakbewal rikbewal rangko aro songsalo ja∙rikbaenggipani gamchataniko u∙ina nanga. Iarango pangchake ua ma∙mong sorkarina talate bil amma dipet kamrangko ka∙na nanga ineba GSU ni President aganangaha.
