North Garo Hills, A·dokgre jolo gue aro sal·wa badinggiparangoniko niamgri tangka gile cha·enganina AHAM Adokgre Regional Unit aro Organic Farmer Cooperative Society Adokgre, a·jani Deputy Commissioner-ko gronge ong·enggipa obostarangni bidingo janapangaha. Indake dakanichi bading chiwalgiparangna, game cha·giparangna aro songdongenggipa manderangna sinjetaniko on·engani gimin ta·rake nirokatchina DC-ko mol·molangaha.
Niamni a·palo tangka gile cha·enggiparangko gue aro sal·wa badinggiparang bang·a check-point rango chagrongna nangao ga·akenga. Iarangni a·sel bosturangni damrang barienga, man·gnirangko komiatenga aro unbaksana bading chiwale cha·angkuna neng·nikaniko aro gisik bilgriataniko man·enga. Bang·a badinggiparangan dingtang dingtang dolrangoni ka·mik kenatanirangko aro sinjetanirangko man·a jean uamangna kenaniko ra·baan baksa a·dokni kajina man·anikoba komiatenga ine aganangkuaha.
Ia indakgipa niam gri tangka gile cha·enggipa dolrangoni badinggiparang naljokna man·agita sorkariko nirokatchina AHAM aro Farmer Society didiataha. Obostarangko chagrongenggiparang rang·san koborko on·atnagita helpline-rangkoba tarichina uamang janapangjolaha. Unbaksana, indake chonchongipa badinganirangko dake cha·enggiparangko naljoksona task force ba nirikigipa dolrangko watchinaba jinma songdonggiparangni palo DC-ko mol·molangaha.
